Grobničan

četvrtak, 14.09.2006.

GROBNIČAN - DINAMO Meni nikako ne gre va glavu da će Grobničan igrat zvelin Dinamon.Judi će normalno doć i odigrat utakmicu ko ča su ju milijon put do sad. Nego ja se čudin ovimi našimi, oni koda su poludeli. Simi skin povedaš voštariji ćakulaju samo o tomu. Kuliko judih će bit? Kuliko osiguranja? Kuliko policije? Kuliko zaštitarih? Kuliko Armade? Kuliko Bed blu bojsih? Kamo ćemo jih stavit? Ki će se potuć i ki neće? Hijadu pitanj i potpitanj a ja mislin da je to se bezveze aš, potrošit će soldih na jednu utakmicu više nego drugi sporti va leto dan. Ja mislin da su oni poludeli i da jih drži nogometna groznica, ali će ih prepasat kad zgube utakmicu ( iako su pred ovun dobili 5:0 ) Onda će bit Smo mogli ovako. Smo mogli onako. Zač ni igral onisti? Zač ovo zač ono? Nać ćemo hijadu razlogih zač smo zgubili i bit će nan si krivi osin nas. A soldi !!!!! Ki će opće posle pitat kamo i kuliko smo ih potrošili samo na jednu utakmicu. Glavno da dojdu zagreba i da se nažderu Grobničkoga sira, toj trenutno najvažnije na Grobniku. Meni je od toga slabo. A vami?????????????????????? P.S. Nemoren a da ne napišen pjesmu od Ivana Brdara Grobniškog UTAKALNICA Od konobe do konobe lipo se pejaju Do desete drito hode potli šemetaju Pomalo se šale, piju i kantaju. To j' njihova zemja, tu su se rodili To j' njihova muka, zač su se potili Pa užance lipe stare zač bi pozabili. Se van se to naše staro još ovdika štuje Svojun mukun, svojin poton lipo naslajuje Hodi simo, na pij, kume, to se cel dan čuje. Pa kad ti se s kegod strane uglase sopele Divojke se naziraju zatancat bi tele Mladić skoči po divojku, obrnimo Jele. Ah, ča j' lipo kad su judi tako va koraju Lipe šale, tanac, kanat vidiš po sen kraju Vidi mi se, Mare moja, kako da san v raju. Starije će već po svoju pul vina navijat Mlajarija, ona lipo tancajuć uživat Matere te će skraja krpice prišivat.

utorak, 22.08.2006.

Dragi Vi Ne znan ča mi je zadnje vrime. Samo mi se spi i niš mi se ne da . Neda mi se pisat neda mi se ni mislet a kamo ča drugo. Ovo leto bin opisal po jednoj pjesmi od Duška Jeličića i grupe Bonaca « malo san bil semo ...malo san bil tamo i karti san igral i san se nakramal» Bil san malo na Krku, malo na Cresu i evo za ki dan će Bartoja a reče se da j` to kraj leta. Nego malo mislin zač na Grobniku postoje tri crikve i dve općine, po mojmu to bi bila samo jedna općina. Odvavik je to bila jedna općina ili kotar ili bog zna kako se j` to prvo reklo. Sjećan se kad san malo bil čital «Vinodolski Zakonik» da se tamo spominje Grobnik ko jednu cjelinu ko j` sjedište bilo Grad Grobnik. Ni bilo nikakove općine Čavja ni općine Jelenji. Mislin da su Grobničani jedni judi i da ni veći ili manji Grobničan ako on biva va Podkilavcu ili va Pašcu. To su napravili političari aš imaju svoji interesi, od toga žive. Ja stvarno ne vidin ni va jednoj ni va drugoj općini jednoga pametnoga čovika komu bin dal da vodi 12 hijad judih ki bivaju na Grobnišćini. Stvarno smo blesavi kad vidin koga smo mi se birali, nimaju dve čiste o ničemu, nebin jin dal ni da mi čuvaju ovce a kamo da ča vode. Ali ča ćemo.....kad ovi malo pametniji neće da imaju posla zovimi pa neće da gredu va politiku. Kuliko se samo soldih tako hita bez veze, mesto da se to potroši na puno pametnije stvari, kod ča su mladi i dica, ali o tomu ću pisat drugi put. Za kraj ću stavit još jednu pjesmu od Ivana Brdara Grobniškog. SKRB NAŠEGA SVITA Šume, Planine, Ričina, Meje, poje. Tu su naši stari Imeli Živjenji svoje. Rabilo puno Muke i pota Da se zbrišu Brige života. Na toj črnoj zemji Teško j' živjenji, Ma j' med timi judi Velo pošćenji. To j' moja zemja, Moj trdi koren. Ja toga pozabit Neću Ne smin I ne moren.

petak, 11.08.2006.

GROBNIČANI VESELO Nemoren a da ne napišen jednu predivnu pjesmu od našeg najbojeg pjesnika Ivana Brdara Grobniškog GROBNIČANI VESELO Obrnimo veselo, Ča moremo boje, Dokli nan je mlada krv, Dokli j' lipe voje. Sopnja, tanac, kantanji, To ča srce pita, To j' naš kraj domaći, Najlipši od svita. Drag je meni Grobnik Grad, Gori na Vršiću, Ma recite, ča ni lip, Vas sličan mladiću. Saki sebe najvoli, Drži, čuva svoje, Pa ću i ja Grobničan, Štimat to ča j' moje. Naša narav vesela, Ona vridi zlata, Kamo dojdeš oprto ti j' i srce i vrata. Mi štimamo slobodu, Ime, staru slavu, Tuka j' slavni Batu-kan Pustil svoju glavu. Naš ČA dragi čuvamo, Tanac, kanat lipi, Glas vidulic, sopel, miha, Ča nan srce kripi. Tuka smo mi najjači, Pu svojga ognjišća, Ovdi j' smih najslaji, Beseda najčišća. Grobničani veselo Po sopel i miha, Zatancajmo, zakantajmo, Dokli j' sape, diha.

ponedjeljak, 07.08.2006.

Dobri judi !!!! Ovaj blog je zamišljen da na njemu provamo pisat se ča je lipo i se ča nevaja na našen lipon i dragon Grobniku. Za to vas pozivan da pišete svoje komentare i da stin pomorete nami običnimi judi da naše živjenje na Grobniku bude čin boje i čin zanimjivije. Ja ću pisat svoje mišljenje i iskustva, a vi se morete priključit pa ćemo zajednički ča popravit. Provat ću pisat o semu (politika, sport, kultura, slobodne aktivnosti, izlasci, alkohol, droga) i o semu ča mi more past na glavu. (vjerujte mi more mi past puno toga) Morda se nekomu neće pijažat ča će ovdi pročitat ali ja mu ne moren pomoć. Mislin da glas običnoga puka ni dosta zastupljen i da nas vode neki polupismeni judi kih ni briga za nas ni za našu dicu nego gjedaju samo svoju guzicu. (ma san to lipo napisal) I zato judi pozivan vas da ovdi napišete se ča van smeta i se ča vas tišti u vezi živjenja na Grobniku. Boh Grobničani (vavik ponosni judi) P.S. morete mi pisat na grobnicani@net.hr

četvrtak, 03.08.2006.

Tu je jubav moja Kad ja obajden moju Grobnišćinu, I z okon kad dotaknen stari grad, I kad te ja zagrlin uz Ričinu, Moju ti jubav dajen srcen rad, A kad se misec digne nad Primorjen, I kad mi oko prvin snon zaspi, Vrnjan se vavik dragom kraju svome, Nigdi na svitu za me lipjeg ni Tu je jubav moja i klapa stara, A lipi kanat naš leti va noć, Sope armonika, prati gitara, Meni još vrime ni za doma poć Kad se Kvarnerom zasrebrne žali, I Platak kad potone već va noć, I kad si škoji podragaju vali, Ne moren drugo leh opet nazad doć Tu je jubav moja i klapa stara, A lipi kanat naš leti va noć, Sope armonika, prati gitara, Meni još vrime ni za doma poć Meni još vrime ni za doma poć Tu je jubav moja

<	rujan, 2006
P	U	S	Č	P	S	N
				1	2	3
4	5	6	7	8	9	10
11	12	13	14	15	16	17
18	19	20	21	22	23	24
25	26	27	28	29	30

Dnevnik.hr
Gol.hr
Zadovoljna.hr
Novaplus.hr
NovaTV.hr
DomaTV.hr
Mojamini.tv